Qoʻqon shahrida uyali telefon apparatini oʻgʻirlagan shaxs fosh boʻldi
Qoʻqon shahri. 28-aprel kuni fuqaro Oʻ.M IIBga murojaat qilib, unda shu kuni Navbahor koʻchasida joylashgan savdo kompleksida narhi 2.000.000 soʻmlik “Red Mi-8” rusumli telefon apparatini ehtiyotsizligi oqibatida yoʻqotganligini bildirgan.
Tergovga qadar tekshiruv harakatlari davomida, 28-aprel kuni noma’lum shaxs Navbahor koʻchasida joylashgan savdo kompleksidagi savdo rastasi ustida qarovsiz qoldirilgan Oʻ.M.ning “Red Mi-8” rusumli uyali telefon apparatini yashirin ravishda oʻgʻirlaganligi aniqlangan.
Mazkur holat yuzasidan Qoʻqon shahar IIO FMB huzuridagi tergov boʻlimi tomonidan Jinoyat kodeksining 169-moddasi 1-qismi (oʻgʻirlik) bilan jinoyat ishi qoʻzgʻatilgan.
Olib borilgan tezkor qidiruv harakatlari davomida ushbu jinoyatni I.R sodir etganligi aniqlanib, protsessual tartibda ushlangan.
Eslatib oʻtamiz, Jinoyat kodeksining 169-moddasi 1-qismida koʻrsatilgan jinoyatni sodir etgan shaxs besh yilgacha ozodlikdan mahrum qilish bilan jazolanadi.
Hurmatli fuqarolar, oʻz mol-mulkingiz, pul mablagʻlaringizni ehtiyot qiling! Bu bilan oʻgʻirlik jinoyatlarining oldini olishga hissa qoʻshgan boʻlasiz.
Fargʻona viloyati IIB Axborot xizmati
