4 Noyabr 2023 yil
1107
“Loyson” mahallasida joylashgan profilaktika katta inspektorining xizmat uyi o‘rganildi
Farg‘ona viloyati IIB hamda uning tarkibiy bo‘limlarida kuz-qish mavsumiga tayyorgarlik ko‘rish yuzasidan o‘quv seminari davomida seminar ishtirokchilari Qo‘shtepa tumani ichki ishlar bo‘limi Jamoat xavfsizligi xizmati Huquqbuzarliklar profilaktikasi bo‘linmasi profilaktika katta inspektori, mayor Ikromjon Salohidinovning xizmat uyida ham bo‘lishdi.
“Loyson” mahallasida joylashgan obod va fayzli xizmat uyidagi shart-sharoitlar, ozodalik va sarishtalik ishtirokchilarda iliq taassurot qoldirdi.
Mayor Ikromjon Salohidinov xizmat uyida tovuq boshqa parrandalarni, noyob qushlarni boqishi, turmush o‘rtog‘i bilan hamjihatlikda hovlisida turfa gullarni parvarishlashlarini guvohi bo‘ldilar.
Shu bois xonadon eshigidan kirganingizdayoq bahri dilingiz ochilishi tabiiy hol.
Ikromjon Salohidinovning turmush o‘rtog‘i esa tikuvchilik kasbi bilan shug‘ullanadi. O‘z uyida mahalla qizlariga hunar o‘rgatib, ularni ish bilan ta’minlamoqda.
Tadbir davomida har bir profilaktika inspektorining xizmat uyida mazkur uyga o‘xshagan shart-sharoit bo‘lishi, ichki ishlar xodimi yashagan xonadon fayzli va obod go‘shaga aylanishi, fuqarolarga namuna bo‘lishi kerakligi ta’kidlandi. Bu borada mutasaddi rahbarlarga zarur tavsiyalar berildi.
Farg‘ona viloyati IIB Axborot xizmati
