Ma’lumki, inson salomatligini mustahkamlash va jismoniy faolligini oshirishda sportning o‘rni juda muhim.

Ayniqsa, ichki ishlar organlari xodimlarining sport bilan muntazam shug‘ullanib borishi ularning kasbiy va jismoniy tayyorgarligini oshirishda muhim omil bo‘lib xizmat qiladi.

Viloyat IIB Tergov boshqarmasi, migratsiya va fuqarolikni rasmiylashtirish boshqarmasi, ekspert-kriminalistika markazi hamda uning quyi tizimi xodimlari o‘rtasida mini futbol bo‘yicha tashkil etilgan boshqarma boshlig‘i o‘rinbosari kubogi musobaqalari ham ana shu ezgu maqsadga xizmat qildi.

Osoyishtalik posbonlari maydonda nimalarga qodir ekanliklarini amalda isbotlash uchun bor mahoratlarini ishga soldilar.

Qizg‘in va murosasiz bahslarda esa eng mohir sportchilardan iborat jamoalarning qo‘li baland keldi.

Musobaqa yakuniga ko‘ra, viloyat IIB huzuridagi Tergov boshqarmasi terma jamoasi faxrli 1 o‘rinni qo‘lga kiritdi. Farg‘ona tumani IIB tergov bo‘limi terma jamoasi ikkinchi, Oltiariq tumani IIB tergov bo‘limi jamoasi esa uchinchi o‘rin sohibiga aylandi.

Shuningdek, eng yaxshi darvozabon va eng yaxshi to‘purar nominatsiyalari g‘oliblari ham aniqlanib, boshqarma rahbariyati tomonidan munosib taqdirlandi.

Bir so‘z bilan aytganda, ushbu sport musobaqalari soha xodimlari o‘rtasida do‘stlik va hamjihatlikni mustahkamlab, ularning jismoniy va jangovar tayyorgarligini yuksaltirishga xizmat qildi.

Farg‘ona viloyati IIB Axborot xizmati