Farg‘ona viloyati ichki ishlar organlarida xizmat qilayotgan yosh xodimlarni Vatanga muhabbat va kasbga sadoqat ruhida tarbiyalashda “ustoz-shogird” an’anasidan samarali foydalanilmoqda. Bu borada viloyat ichki ishlar boshqarmasi Faxriylar kengashi a’zolarining tajribalari juda qo‘l kelyapti.

Joylarda uch avlod uchrashuvlarini tashkil etish orqali ustozlarning boy amaliy tajribasi yoshlar ongiga chuqur singdirilmoqda.

Yosh profilaktika inspektorlariga esa shu sohada boy amaliy tajribaga ega faxriylar murabbiy sifatida biriktirilyapti.

Masalan, Furqat tumani IIB shaxsiy tarkibi, iste’fodagi faxriylar hamda Farg‘ona viloyati IIB rahbariyati ishtirokida tashkil etilgan uch avlod uchrashuvi ham ana shu ezgu maqsadga qaratilgani bilan ahamiyatli bo‘ldi.

Ichki ishlar organlarida xizmat qilayotgan yosh xodimlar o‘rtasida vatanparvarlik va kasbga sadoqat hissini shakllantirish, yoshlar o‘rtasida qonunchilik va xizmat intizomini mustahkamlash hamda ularning ma’naviy-ma’rifiy bilimlarini oshirish maqsadida o‘tkazilgan tadbirda ustozlar so‘zga chiqib, yosh xodimlarga o‘z mas’halat va tavsiyalarini berdilar.

Shu kuni 5 nafar yangi ish boshlagan inspektorlarga iste’fodagi faxriylardan murabbiylar biriktildi.

Shuningdek, joriy yilning ikkinchi chorak yakuni bo‘yicha xizmat faoliyatida yuqori natijalarga erishgan 21 nafar profilaktika inspektorlari pul mukofoti bilan rag‘batlantirildi.

“Ustoz-shogird” ana’anasi asosida yo‘lga qo‘yilgan ushbu tajriba Furqat tumani mahallalarida ham yaxshi samara bermoqda.

Yoshlarga murabbiy sifatida biriktirilgan faxriylar bevosita mahallalar yettiligi bilan hamkorlikda ish olib borib, “xonadonbay” o‘rganishlarda ishtirok etishyapti. 

Bir so‘z bilan aytganda, jinoyatchilikni jilovlashda yosh inspektorlarga yaqindan yordam bermoqdalar.

Bu ezgu tashabbus yurtimizni yanada farovon, tinch va osoyishta bo‘lishiga xizmat qiladi.

Farg‘ona viloyati IIB Axborot xizmati