Joriy yilning aprel oyida Toshloq tumanida joylashgan 5-sonli umumta’lim maktabi sport maydonida “Besh tashabbus olimpiyadasi” doirasida muhim sport tadbiri – “Ichki ishlar vaziri kubogi” uchun musobaqaning mahalla bosqichi tantanali ravishda start oldi. Ushbu musobaqa mahallalardagi yoshlar o‘rtasida sog‘lom turmush tarzini qaror toptirish, ularni ommaviy sportga jalb etish hamda fuqarolar o‘rtasida hamjihatlik va do‘stlikni mustahkamlash maqsadida tashkil etilmoqda.

Tadbirning ochilish marosimida Toshloq tumani hokimi hamda tuman ichki ishlar bo‘limi boshlig‘i ishtirok etdilar. Ular yoshlarga muvaffaqiyat va faol ishtirok tilab, musobaqaning ahamiyati va maqsadlari haqida to‘xtalib o‘tdilar.

Musobaqa nizomiga ko‘ra, bellashuvlar 16–21 yosh hamda 22–30 yosh toifalari bo‘yicha alohida o‘tkaziladi. Qatnashuvchi jamoalar o‘rtasida adolatli raqobatni ta’minlash maqsadida qur’a tashlash orqali guruhlarga ajratish amaliyoti joriy qilindi. Musobaqalar davomida jamoalar sportning voleybol turi bo‘yicha o‘zaro kuch sinashib, tuman bosqichiga yo‘llanma uchun kurash olib boradilar.

Ushbu tadbir yoshlarning bo‘sh vaqtini mazmunli tashkil etish, jismoniy faollikni oshirish va sport orqali vatanparvarlik hissini yuksaltirishda muhim ahamiyat kasb etadi.