Хотира – ўзликни англатади, қадр эса инсонни улуғлайди, жамиятни безайди. Хотира ва қадрлаш куни байрамининг мазмун-моҳиятида ҳам ана шундай эзгу тамойиллар мужассам.

Катталарга ҳурмат, кичикларга иззат, меҳр-оқибат туйғулари халқимиз қалби ва шууридан чуқур жой олган. Аждодлар хотирасини ёд этиб, эзгу ишларини давом эттириш, бугун сафимизда юрган, элу юрт тинчлиги ва равнақи йўлида хизмат қилган кексаларни эъзозлаш маънавий ҳаётимизнинг ажралмас қисмига айланган.

Бугун Фарғона вилояти бўйлаб ўтказилган Хотира ва қадрлаш байрами тадбирларида ана шундай қадрият ва анъаналаримиз ўз аксини топди.

Фарғона шаҳридаги "Ватанпарварлар боғи"да умумхалқ байрами тантаналари доирасида эҳтиром тадбири ташкил этилиб, “Мотамсаро она” ҳайкали пойига гулчамбар қўйилиб, ўтганлар хотирасига ҳурмат бажо келтирилди.

Маросимда вилоят ҳокимлиги, Шарқий ҳарбий округ қўмондонлиги, секторлар ва ҳуқуқ-тартибот органлари раҳбарлари, вилоят бошқармалари бошлиқлари, жамоатчилик ҳамда аҳоли вакиллари иштирок этиб, мажмуа пойига гулчамбарлар қўйдилар.

Хусусан, вилоят ички ишлар бошқармаси раҳбар ва ходимлари ҳам эҳтиром тадбирида фаол иштирок этиб, ўтганлар руҳига чуқур ҳурмат бажо келтирдилар.

Ушбу тадбир халқимиз орасидаги ўзаро меҳр-оқибат, ўтганларни хотирлаш, тирикларни қадрлаш каби инсоний туйғулар ва қадриятларнинг амалдаги ифодаси сифатида ёдда қоладиган бўлди.

Тадбир ёшларни она ватанга муҳаббат, аждодлар хотирасига ҳурмат руҳида тарбиялашга хизмат қилувчи бадиий чиқишлар билан давом этди.